អស្ចារ្យ! រឿង"មុនដំបូងខ្មែរក្រហមសម្លាប់ប៉ារបស់ខ្ញុំ" នឹងចេញទៅដណ្ដើមពាន Oscar ឆ្នាំនេះ

រឿង "មុនដំបូងខ្មែរក្រហមសម្លាប់ប៉ារបស់ខ្ញុំ" ឬ "First They Killed My Father" ដែលដឹកនាំដោយកំពូលតារាហូលីវូដ Angelina Jolie បានជាប់ឈ្មោះតំណាងភាពយន្តកម្ពុជា ចេញទៅដណ្ដើមពានរង្វាន់ក្នុងកម្មវិធីប្រកួតគុណភាពភាពយន្តដ៏ធំផ្ដាច់គេប្រចាំឆ្នាំ។

រឿងនេះ ត្រូវបានជ្រើសរើសជាផ្លូវការដោយក្រុមគណៈកម្មការកម្ពុជាឲ្យចូលរួមប្រកួតផ្នែក"ភាពយន្តដែលនិយាយភាសាបរទេសល្អផ្ដាច់គេ" ឬ "Best Foreign-Language" ក្នុងកម្មវិធីប្រកួតពានរង្វាន់ Oscar លើកទី៩០ ដែលនឹងត្រៀមមកដល់នាពេលខាងមុខ ។ តំណាងក្រុមគណៈកម្មការខាងលើ បានលើកឡើងថា មូលហេតុដែល "First They Killed My Father" ជាប់ជាភាពយន្តតំណាងកម្ពុជាចេញប្រកួតព្រោះរឿងនេះ ជារឿងដែលរំលេចព្រឹត្តការណ៍ប្រវត្តិសាស្ត្រដ៏សែនខ្លោចផ្សាររបស់កុមារម្នាក់ក្នុងសម័យនោះ។ ថ្វីត្បិតតែរឿងនេះមានពាក្យពេចន៍សន្ទនាតិចតួចមែន តែវាអាចធ្វើឲ្យអ្នកទស្សនាយល់ពីខ្លឹមសាររឿងបានកាន់តែច្រើនតាមរយៈរូបភាព។

ជាមួយគ្នានោះ តារាហូលីវូដដែលមានសញ្ជាតិកម្ពុជា Angelina Jolie ពោលថា៖ "នេះគឺជាការតបស្នងដ៏ល្អមួយទៅដល់អ្នកពាក់ព័ន្ធទាំងអស់ក្នុងការផលិតភាពយន្តនេះ។ ដោយផ្ដួចផ្ដើមឡើងពីការសហការជាមួយសិល្បករខ្មែរ លើបទពិសោធន៍ថ្មី និងដើម្បីឲ្យរឿងនេះបង្កើនភាពល្បីល្បាញបន្តិចម្ដងៗ" ។

ក្នុងនោះ អ្នកស្រី អ៊ឹង លួង បានថ្លែងពីអារម្មណ៍របស់ខ្លួនថា៖ "យើងទាំងអស់គ្នាពិតជាមានក្ដីរំភើបណាស់ ក្រោយទទួលបានដំណឹងនេះ។ វាគឺជាផ្លូវដ៏វែងឆ្ងាយមួយ ដែលរឿងរ៉ាវផ្ទាល់ខ្លួនរបស់ខ្ញុំបានក្លាយកញ្ចក់ឆ្លុះបញ្ចាំងពីតថភាពពិតរបស់ប្រជាជនខ្មែររាប់លាននាក់។ ពួកយើងពិតជាមានមោទនភាពយ៉ាងខ្លាំងដែលបានតំណាងកម្ពុជាចេញទៅប្រកួតក្នុងឆ្នាំនេះ ថែមទាំងមានបង្ហាញជ្រុងមួយនៃប្រវត្តិសាស្ត្ររបស់នេះទៀតផង"៕